မေ ၊ ၉ ၊ ၂၀၂၄
TT (VOM)
ဧရာဝတီတိုင်း ၊ မအူပင်ခရိုင် ၊ မအူပင်မြို့ရဲ့ အရှေ့ဘက်ကမ်း တပင်ရွှေထီနားမှာ ဒီကနေ့ ညနေပိုင်းက အအေးခေါင်းသယ်ယူလာတဲ့ နာရေးကူညီမှု ကားတစီး တိမ်မှောက်ခဲ့တာကြောင့် အဲ့ဒီယာဥ်ပေါ်မှာ လိုက်ပါလာတဲ့ ပရဟိတသမား သုံးယောက်သေဆုံးခဲ့တယ်လို့ ဒေသခံတွေဆီက သိရပါတယ်။
“ညောင်ဝိုင်းရွာ နာရေးကူညီမှု အဖွဲ့အတွက် အအေးခေါင်းကို ရန်ကုန်ကနေ ကျောင်းရွာကို သယ်ယူလာပေးတယ် ၊ သယ်ယူလာတဲ့ကားက 77 စတိုးက လိုက်ထရပ်ကားလို့ ကနဦး သိရတယ် ၊ အဲ့ဒီကားက ဘီးပေါက်ပြီး လမ်းဘေးမြှောင်းထဲထိုးကျ တိမ်းမှောက်သွားတယ် ၊ အဲ့ဒီကားပေါ်မှာ လိုက်ပါလာတဲ့ ပရဟိတသမား သုံးယောက်သေဆုံးတယ် ၊ သေဆုံးသူတွေကတော့ ညောင်ဝိုင်းပရဟိတက ဦးထွန်းထွန်းနဲ့ ဦးဌေးလွင်ဖြစ်တယ် ၊ နောက်တယောက်က အမှတ် ၁၂ ရပ်ကွက်က ဦးကျော် (အများအခေါ်) ဖြစ်တယ် ” လို့ ပြောပါတယ်။
အဲ့ဒီ နာရေးကူညီမှုကားတိမ်းမှောက်ခဲ့တဲ့ နေရာကို မအူပင်မြို့မှာရှိတဲ့ လူမှုကူညီရေး အဖွဲ့တွေနဲ့ မီးသတ်ကယ်ဆယ်ရေး အဖွဲ့တွေ သွားရောက်ကယ်ဆယ်နေတယ်လို့ သိရပါတယ်။
ပြီးခဲ့တဲ့ ၂၀၂၃ ရဲ့ တနှစ်တာအတွင်း နိုင်ငံအဝှမ်း ယာဉ်တိုက်မှုပေါင်း (၄၂၅)ကြိမ်ဖြစ်ပွားခဲ့ရာ သေဆုံး သူပေါင်း (၂၃၀)ဦးရှိခဲ့ပြီး ထိခိုက်ဒဏ်ရာရရှိသူပေါင်း (၅၆၄)ဦး ရှိခဲ့တယ်လို့ ယာဥ်မှုစစ်အဖွဲ့ရဲ့ မှတ်တမ်းတွေအရ သိရပါတယ်။
